ဖိလစ်ပိုင်မုန်းတိုင်း သေဆုံးသူ ၉၀၀ ကျော်ရှိ

ဖိလစ်ပိုင်နိုင်ငံမှာ တိုက်ခတ်ခဲ့တဲ့ ၀ါရှီ အပူပိုင်းမုန်တိုင်းကြောင့် သေဆုံးတဲ့သူ အရေအတွက်ဟာ တနင်္ဂနွေနေ့မှာ ၆၅၂ ယောက်အထိ ရှိသွားခဲ့ပြီဖြစ်ပြီး အခုချိန်အထိ ပျောက်ဆုံးနေတဲ့လူ ၉၀၀ ကျော်ကိုတော့ ကယ်ဆယ်ရေး အဖွဲ့တွေက ဆက်ပြီးတော့ ရှာဖွေနေကြပါတယ်။
ဝါရှီမုန်တိုင်းဟာ ဖိလစ်ပိုင်နိုင်ငံတောင်ပိုင်း မင်ဒါနာအိုကျွန်းကို သောကြာနေ့ညက အပြင်းအထန် ၀င်ရောက် တိုက်ခတ်ခဲ့တာဖြစ်ပြီး မုန်တိုင်းကြောင့် ရေလွှမ်းမိုးမှုတွေဖြစ်ပြီး ကာဂါယန်ဒေအိုရို နဲ့ အီလီဂန် (Cagayan de Oro and Iligan) ဒေသမှာရှိတဲ့ ကမ်းခြေရွာ ဒါဇင်ပေါင်းများစွာက အိမ်တွေလည်း ရေထဲမှာ မျောပါသွားခဲ့ပါတယ်။
မုန်တိုင်းအတွင်းမှာ သေဆုံးသူတွေအများဆုံးဟာ အမျိုးသမီးတွေနဲ့ ကလေးငယ်တွေဖြစ်ပြီး လူပေါင်းသောင်းနဲ့ချီ အိုးမဲ့အိမ်မဲ့ဖြစ်ခဲ့ကြတယ်လို့ ဖိလစ်ပိုင်ကြက်ခြေနီးအဖွဲ့က ပြောပါတယ်။ ကျန်းမာရေးအန္တရာယ် စိုးရိမ်ရတဲ့ အခြေအနေတွေကြောင့် သေဆုံးသူတွေကို အစုလိုက်အပြုံလိုက် မြေမြှုပ်သဂြုင်္ိဟ်ဖို့ အကြံပေးထားပါတယ်။ ပုပ်ပွနေတဲ့ လူအလောင်းတွေကလွဲပြီး ကျန်တဲ့ သေဆုံးနေတဲ့ တိရစ္ဆာန်တွေကတော့ ရွံ့တွေထဲမှာ ပြန့်နေပါတယ်။
ကယ်ဆယ်ရေးလုပ်ငန်းတွေကို ကုန်းပေါ်မှာ အဓိကထား လုပ်ဆောင်နေပါတယ်။ ဒါပေမဲ့ ပင်လယ်ထဲမှာ သင်္ဘောအသေးလေးတွေနဲ့ ကယ်ဆယ်ရေး လုပ်နေတဲ့သူတွေက ကမ်းရိုးတန်းတလျှောက်မှာ အသက်မသေဘဲ ရှိနေသေးတဲ့သူတချို့ကို ကယ်တင်နိုင်ခဲ့တယ်လို့ အာဏာပိုင်တွေက ပြောပါတယ်။ ဖိလစ်ပိုင်စစ်တပ် နဲ့ ရဲကလည်း ကယ်ဆယ်ရေးလုပ်ငန်းတွေမှာ ပါဝင်ခဲ့ကြပါတယ်။ ဒါပေမဲ့ လမ်းပန်းဆက်သွယ်ရေး အဆင်မပြေတာနဲ့ လျှပ်စစ်မီးမရှိတာကြောင့် ကယ်ဆယ်ရေးလုပ်ငန်းတွေဟာ အခက်အခဲတွေနဲ့ ရင်ဆိုင်နေကြရပါတယ်။









ဖိလစ်ပိုင်နိုင်ငံတောင်ပိုင်း မင်ဒါနာအိုကျွန်းမှာ ပြီးခဲ့တဲ့သီတင်းပတ်ကုန်ပိုင်းက မုန်တိုင်းတိုက်ခတ်ပြီး ရေလွှမ်းမိုးမှုကြောင့် သေဆုံးခဲ့ရတဲ့ ရာနဲ့ချီတဲ့လူတွေရဲ့ ရုပ်အလောင်းတွေကို အစုလိုက်အပြုံလိုက် မြေမြှုပ်သဂြုင်္ိဟ်ဖို့ စီစဉ်နေကြောင်း အစိုးရ တာဝန်ရှိသူတွေက တနင်္လာနေ့မှာ ပြောဆိုလိုက်ပါတယ်။
တချို့သေဆုံးသူတွေရဲ့ ဆွေမျိုးတော်စပ်သူတွေက ကန့်ကွက်မှုတွေ ရှိနေပေမဲ့ ကျန်းမာရေး အခြေအနေကို ထောက်ရှုပြီး ဒီလို အစုလိုက်အပြုံလိုက် မြေမြှုပ်သဂြုင်္ိဟ်တဲ့ အစီအစဉ်ကို ဒီကနေ့ အင်္ဂါနေ့မှာ စတင်ပြုလုပ်မှာ ဖြစ်တယ်လို့ တာဝန်ရှိသူတွေက ပြောပါတယ်။
တနင်္လာနေ့က ရရှိထားတဲ့ စာရင်းအရ သေဆုံးသူ အရေအတွက်ဟာ ၉၂၇ ယောက်ကျော် ရှိသွားပြီဖြစ်ပြီး အများစုဟာ ကလေးတွေနဲ့ အမျိုးသမီးတွေဖြစ်တယ်လို့ ဆိုပါတယ်။ ပျောက်ဆုံးနေသူ အရေအတွက်ဟာ ဆိုရင်လည်း ၈၀၀ ကျော် ရှိနေပါတယ်။
ပုပ်ပွနေတဲ့ ရုပ်အလောင်းတွေက ကျန်းမာရေးအတွက် ခြိမ်းခြောက်မှုတစ်ခုလို ဖြစ်နေကြောင်း မြို့ပိုင် လောရင့်စ်ခရုစ်က ပြောဆိုပါတယ်။
အစုလိုက်အပြုံလိုက် မြေမြှုပ်သဂြုင်္ိဟ်ဖို့ အမိန့်ပေးရတာကလည်း မြို့ရဲ့ ကျန်းမာရေးဌာနရဲ့ အကြံပေးမှုကြောင့် ပြုလုပ်ရတာဖြစ်တယ်လို့ သူကပြောပါတယ်။